ទស្សនកិច្ចសិក្សាស្តីពីការស្ថាបនាឡើងវិញបន្ទាប់ពីគ្រោះមហន្តរាយដោយរញ្ជួយដី និងរលកយក្សស៊ូណាមី

សេចក្តីផ្តើម

          ដើម្បី​ស្តារ​ឡើង​វិញពី​មហា​គ្រោះ​មហន្តរាយដែលបានកើតមាន​នៅ​នៃ​ប្រទេស​​ជប៉ុន​ ក្រសួង​​ការ​បរទេស​ជប៉ុនបានអនុវត្ត​នូវ​កម្មវិធី​ទំនាក់ទំនងផ្លាស់​ប្តូរ​បទ​ពិ​សោធន៍​​រវាង​យុវជន​យុវនារី ក្នុង​បំណង​ជំរុញ​ការ​យល់​ដឹង​ពី​សង្គម​អន្តរជាតិលើការ​ស្តារ​ប្រទេស​ជប៉ុន​ឡើង​វិញ។ ហេតុដូច្នេះហើយ​ទើប​យើង​ខ្ញុំ​អាច​មាន​ឱ​កាស​បានទៅ​បំពេញ​ទស្សនកិច្ច​សិក្សា​ក្នុង​ប្រទេស​ជប៉ុន​រយៈពេល​១០ថ្ងៃ ក្នុង​នាម​តំណាង​ឲ្យ​និស្សិត​ខ្មែរ​ ក៏ដូចជា​តំណាង​ឲ្យប្រជា​ជន​ខ្មែរ​ទាំង​មូល​ផងដែរ។ តាម​រយៈ​ដំណើរ​ទស្សនកិច្ច​នេះ​យើង​ខ្ញុំ​បាន​ទទួល​នូវ​ចំណេះ​ដឹង​ជា​ច្រើន​ដែល​ពួក​យើងពុំ​ធ្លាប់​ដឹង​ពី​មុន​មក ព្រមជា​មួយ​ការទទួល​រាក់​ដ៏​កក់​ក្តៅ​របស់​ប្រជា​ជន​ជប៉ុន​គឺ​រឹតតែ​ធ្វើ​ឲ្យ​បណ្តា​គណៈប្រតិភូដែលបាន​ចូលរួមទាំង​អស់​រួមមាន​​ខ្ញុំបាទផងដែរ​នោះ​ មាន​អារម្មណ៍​រំភើប ហើយ​ខិតខំ​ប្រឹង​ប្រែង​បំពេញ​កម្មវិធី​ទស្សនកិច្ច​របស់​ខ្លួន​ឲ្យ​មាន​ប្រសិទ្ធភាព និង​ជោគជ័យ​ប្រកប​ដោយ​ភាពថ្លៃថ្នូរបំផុត។ បន្ទាប់ទៅ​នេះគឺ​ជា​របាយការណ៍ស្តី​ការ​ដំណើរ​ទស្សនកិច្ច​ដ៏​ល្អមួយនេះ ដែល​ខ្ញុំបាទ​បាន​ចង​ក្រង​រៀប​រៀងទុក​ជា​ឯកសារ ហើយ​​ខ្ញុំបាទក៏​សូម​អភ័យ​ទោស​ផង​ដែរ​ចំពោះរាល់​កំហុសឆ្គងផ្សេងៗ​ដែល​កើត​មាន​ឡើង​ដោយ​អចេតនា​នៅ​ក្នុង​របាយការណ៍មួយ​នេះ។

                                                                                                

                                                                               ​​​​  ទីក្រុងតូក្យូ ប្រទេសជប៉ុន​ ២០ ធ្នូ ២០១២

                                                                          ​​​​​​​​​​​​​​            ​           ដោយក្តីរាប់អានដ៏ខ្ពង់ខ្ពស់

                                                                                                អ៊ុក សុវណ្ណារ៉ា

                                                                                               ប្រតិភូមកពីព្រះរាជាណាចក្រកម្ពុជា

របាយការណ៍នៃដំណើរទស្សនកិច្ច

ថ្ងៃទី១០ ខែធ្នូ ឆ្នាំ២០១២(ថ្ងៃទី១)

ថ្ងៃទី១០​ ខែធ្នូ ឆ្នាំ២០១២ ជាថ្ងៃទីមួយ​ដែល​ខ្ញុំបានដល់​ទឹក​ដីនៃប្រទេស​ជប៉ុន។ ចាប់តាំងពីបានមក​អាកាសយានដ្ឋានអន្តរជាតិរបស់​ប្រទេស​ជប៉ុនភ្លាម​ ខ្ញុំមានអារម្មណ៍ភ្ញាក់ផ្អើលជាខ្លាំងចំពោះអាកាសធាតុដែល​មាន​លក្ខណៈត្រជាក់ខ្លាំង ខុសប្លែក​ពីអ្វី​ដែល​ខ្ញុំធ្លាប់បាន​ជួប​នៅក្នុងប្រទេសកម្ពុជា។ ខ្ញុំក៏មានការចាប់អារម្មណ៍ផងដែរទៅលើសោភ័ណភាពទីក្រុងTokyoទាំងមូល​ ដែល​ពោរពេញទៅដោយ​ផ្លូវខ្វាត់ខ្វែងនិង​មាន​ជាច្រើន​ជាន់​ទៀតផង។ មួយវិញទៀតខ្ញុំសង្កេត​ឃើញថា​តាម​ដង​ផ្លូវ​ និងជុំ​វិញ​បរិវេណ​អគារ​នា​នា​ក្នុង​ទី​ក្រុង​មួយ​នេះ​គ្មាន​សំរាម​ ឬ​ កាក​សំណល់​ណា​មួយ​នៅ​ក្រៅ​ធុង​សំរាម​នោះ​ទេ នេះ​ស​បញ្ជាក់​ពី​ភាព​ថ្លៃថ្នូររបស់​ប្រជាជន​ជប៉ុន​ដែល​មាន​ចិត្ត​ចេះ​ស្រឡាញ់​បរិស្ថាន​ និង​ទីក្រុង​របស់​ពួក​គេពិត​ប្រាកដមែន។ រីឯមធ្យោបាយ​សាធារណៈក្នុង​ទី​ក្រុង​មួយ​នេះ​ក៏​មាន​ច្រើន​សម្បូរបែប​ណាស់​ដែរ​ ពោរ​គឺ​មិន​ចាញ់​បណ្តា​ប្រទេស​នៅ​អឺរ៉ុបប៉ុន្មានទេ។ បន្ទាប់ពីបានទទួលការពន្យល់មួយចំនួនទាក់ទងនឹងគ្រោះមហន្តរាយនៅប្រទេសជប៉ុនដែលកើតមាន​ឡើង​នាថ្ងៃទី ១១ ខែមីនា ឆ្នាំ ២០១១ អ្វីដែលខ្ញុំស្ងប់ស្ញែងខ្លាំងបំផុតនោះគឺ ភាពរឹង​មាំ និងភាព​ធុន​នៃអគារ​ដែល​អាចទប់​ទល់​នឹង​ការរញ្ជួយដីបានយ៉ាង​ល្អ។

សរុបមក យើងអាចនិយាយ​បានថាប្រទេស​ជប៉ុនគឺជា​ប្រទេស​មួយ​ដែល​មាន​ការ​រីក​ចម្រើន​ខ្លាំង​ស្ទើរ​គ្រប់​វិស័យ​ទាំង​អស់​ ហើយ​កម្រិត​អប់រំ និង​​ការ​យល់​ដឹង​នៃ​​ប្រជាជន​​ជប៉ុនក៏មានកម្រិត​ខ្ពស់​អាចទទួល​យក​បាន​ផងដែរ។

ថ្ងៃទី១១ ខែធ្នូ ឆ្នាំ២០១២(ថ្ងៃទី២)

នៅពេលព្រឹក ពួកយើងបានចូលរួម​ស្តាប់នូវ​បទបង្ហាញ​មួយស្តីអំពីគ្រោះមហន្តរាយដែល​បាន​កើត​នាពេល​ថ្មី​នេះ​ក្នុង​ប្រទេស​ជប៉ុន។ តាមរយៈបទបង្ហាញដ៏​ល្អមួយ​នេះ ពួកយើងបានទទួលពត៌មាន និង​ចំនេះដឹងជាច្រើន ដែលក្នុងនោះពត៌មានដែលគួរអោយចាប់អារម្មណ៍បំផុត​នោះ​គឺ អំពីគ្រោះមហន្តរាយដ៏ធំធេង​ដែល​បង្កដោយរលកយក្ស​ Tsunamiដែលនាំឲ្យ​មាន​ការ​ខូតខាត​

ទ្រព្យសម្បត្តិ បាត់ជីវិត​មនុស្ស​ និង​ធ្លាយរោងចក្រនុយក្លេអ៊ែរ​នៅFukushimaទៀតផង។ អ្វីដែលគួរឲ្យពួក​យើង​ទាំង​អស់​គ្នា​ភ្ញាក់ផ្អើលនោះគឺថា ចំនួន​មនុស្ស​ស្លាប់ដោយសារការរញ្ជួយដីមានត្រឹមតែ ២០នាក់ប៉ុណ្ណោះ ឯចំនួននាក់ស្លាប់រាប់ម៉ឺននាក់ទៀត គឺបណ្តាលមកពី គ្រោះរលកយក្ស និង ការសាយ​ភាយជាតិវិទ្យុសកម្មទៅក្នុង​បរិយាកាស​ដែល​មាន​គ្រោះ​ថ្នាក់ធ្ងន់ធ្ងរដល់​មនុស្សជាតិ។

សកម្មភាពសិក្សាស្តីពីគ្រោះមហន្តរាយ

នៅពេលរសៀល ពួកយើងបានបន្តដំណើរទស្សនកិច្ចទៅសាលាស្រុកMito ដែលសាលាស្រុកនេះ និង​ក្នុងស្រុក​ទាំងមូល​សុទ្ធតែ​​រងការខូចខាតដោយសារ គ្រោះមហន្តរាយដែលបាន​កើត​មាន​នា​ឆ្នាំ២០១១ ហើយដោយសារតែអគារសាលាស្រុកត្រូវបាន​កសាង​មុន​ ការមាន​ច្បាប់​ស្តី​ពីការ​សាង​សង់​អគារឲ្យ​ធន់នឹង​រញ្ជួយ​ដីទៅ​ទៀត ទើបអគារសាលាស្រុក​នេះ​ពុំមាន​ប្រព័ន្ធការពារសុវត្ថិភាពសម្រាប់ទប់​ទល់​នឹងរញ្ជួយដី៑ ដែល​ជាហេតុ​ធ្វើឲ្យ​អាគារទាំងនោះត្រូវទទួលរងការខូចខាតនិងមិនអាចប្រើប្រាស់បានបន្តទៀត។

សរុបមក ចំពោះ​ដំណើរ​ទស្សនកិច្ចថ្ងៃនេះ ពួកយើងទទួលបាន​នូវ​ចំណេះដឹង​យ៉ាង​ច្រើនអំពី​មហាគ្រោះមហន្តរាយដែលកើតមាននាឆ្នាំ២០១១ និងភាព​ខូចខាត​ផ្សេងៗដែល​ ​ស្រុក​Mito​បាន​ប្រឈមមុខ​ក្រោយ​ពី​គ្រោះមហន្តរាយ​នោះ​បានចប់។

ថ្ងៃទី១២ ខែធ្នូ ឆ្នាំ២០១២(ថ្ងៃទី៣)

​​​​​​​​​នៅពេលព្រឹក ពួកយើង​បានទៅទស្សនាសួនKodokan ដែលជាសួនប្រវត្តិសាស្ត្រ និងអតីត

អាគារសិក្សា និងទីលានហាត់ក្បាច់គុន

ជាសាលារៀនរបស់ កូនមេទ័ពសាម៉ូរ៉ៃជប៉ុននាសម័យមុនៗ។ តាមរយៈដំណើរ​   ទស្សនានេះ ពួកយើងបានរៀនពីវប្បធម៌   ជប៉ុនមួយចំនួន ដែល​នៅសម័យនោះមានតែក្មេងប្រុសទេទើបអាចចូលរៀនបាន ហើយវ័យ​ដែល​​អាចចូលរៀនបានគឺចាប់ពីអាយុ១៥ឆ្នាំ ហើយគេរៀនរហូតដល់ស្លាប់។ តាមរយៈសាលាបុរាណនេះបានបង្ហាញ​​​​ឲ្យ​​​យើង​ឃើញថាប្រទេស​​   ជប៉ុនមានការ​យក​ចិត្តទុកដាក់ខ្លាំង​ទៅ​លើ​វិស័យ​អប់រំ ហើយនេះក៏ជាកត្តាដែលជំរុញឲ្យប្រទេសជាតិមានការរីកចំរើនផងដែរ។

ការផ្លាស់ប្តូរបទពិសោធន៏តាមរយៈការធ្វើបទបង្ហាញ

នៅពេលរសៀល ពួកយើងបានទៅទស្សនាសួន​Kairakuen ដែលជា​សួន​សប្បនិមិត្ត​ដ៏ធំ​មួយនៅ​ក្នុង​ខេត្ត​Ibaraki។ នៅទីនោះ​ពួក​យើង​ត្រូវបាន​ទទួល​រាក់ទាក់ និង​ដឹក​នាំ​ដំណើរ​ទស្សនា​ដោយ​ក្រុម​អ្នក​ស្ម័គ្រចិត្តមួយក្រុម។ បន្ទាប់មក​យើង​បន្តដំណើរទៅ​ទស្សនា​សាលាខេត្តIbaraki ដែល​ជា​កន្លែង​សម្រាប់​ប្រជាជន​គ្រប់​រូបទៅ​ទទួល​សេវាសាធារណៈផ្សេងៗ។ បន្ទាប់មកទៀតពួកយើង​ធ្វើ​ដំណើរទៅសកលវិទ្យាល័យTokiwa។ នៅទីនោះ​ពួកយើងបានធ្វើការផ្លាស់ប្តូរបទពិសោធន៍គ្នាទៅវិញទៅមក​រវាង​និស្សិតកម្ពុជា និង​និស្សិតជប៉ុនតាមរយៈការធ្វើបទបង្ហាញអំពីជីវភាពរស់នៅ និងការរៀនសូត្ររបស់និស្សិតហើយ​យើង​ក៏បានអនុញ្ញាតិឲ្យ​ដើរ​ទស្សនាអគារ​ផ្សេងៗនៃ​សកលវិទ្យាល័យដូច​ជា​អគារ​បណ្ណាល័យជាដើម។​

សរុបមក​ ថ្ងៃនេះពួក​យើង​បាន​ដឹង​អំពីបែបបទនៃការ​រៀន​សូត្រ​ក្នុង​ប្រទេស​ជប៉ុន​នា​សម័យ​សាម៉ូរ៉ៃ ហើយនិង​កន្លែង​លំហែ​កាយ​ដ៏ធំ​នៅខេត្ត​Ibaraki។ យើង​បាន​ដឹង​ពី​រចនាសម្ព័ន្ធ​នៃ​សាលាខេត្ត​Ibaraki ហើយ​យើង​បាន​ស្គាល់​ពី​ជីវភាព​និសិ្សត និង​បទពិសោធន៍របស់​ពួក​គេ​នា​ពេល​មាន​ព្រឹត្តការណ៍​រញ្ជួយដី​នាឆ្នាំ២០១១ផង​ដែរ។

       

ថ្ងៃទី១៣ ខែធ្នូ​ ឆ្នាំ២០១២(ថ្ងៃទី៤)

          នៅពេលព្រឹក យើងធ្វើដំណើរទៅកាន់ឃុំOarai ដើម្បីចូលរួមស្តាប់អំពីការរងគ្រោះនិងការស្តារឡើងវិញរបស់ស្រុកនេះ។ តាមរយៈបទបង្ហាញរបស់គេបានឲ្យដឹងថានៅពេលរញ្ជួយដីនាថ្ងៃទី១១ ខែមិនា ឆ្នាំ២០១១ តំបន់​Oarai ទទួលកម្រិតរញ្ជួយ៥ស្តើង និងទទួលឥទ្ធិពលរលកយក្សខ្ពស់បំផុតមានរហូតដល់ទៅ ៤,២ម៉ែត្រ។ ជាសំណាងល្អ ពុំមានមនុស្សស្លាប់ដោយសារការរញ្ជួយដីនោះទេ។ នេះគឹដោយសារតែស្រុកនេះមានវិធានការទប់ស្កាត់បានល្អចំពោះគ្រោះរញ្ជួយដី និងរលកយក្សស៊ូណាមី ដូចជាមានការសាងសង់ទំនប់ ប្រព័ន្ធផ្សព្វផ្សាយ ឧបករណ៍ផ្សាយសម្លេង រចនាសម្ព័ន្ធបង្ការគ្រោះមហន្តរាយដែលក្នុងនោះមានការបែងចែកដូចជា ក្រុមពត៌មាន ក្រុមពន្លត់អគ្គិភ័យ ក្រុមនាំផ្លូវ ក្រុមជួយសង្គ្រោះ និងក្រុមដាំស្ល ព្រមទាំងមានការចែកផែនទីគេចខ្លួននៅពេលមានរលកយក្សស៊ូណាមីទៀតផង។

លោកម្ចាស់ភោជនីយដ្ឋានចែករំលែកបទពិសោធន៏

បន្ទាប់មកយើងបាន​ទៅ​បរិភោគអាហារថ្ងៃត្រង់នៅ​ភោជនីយដ្ឋាន​មួយ​ក្បែរ​មាត់​សមុទ្រ។ នៅ​ទី​នោះ​ យើង​អាច​មាន​ឱកាស​បាន​ស្តាប់​នូវ​ពាក្យ​សម្តី​ពិត​របស់​ម្ចាស់​ភោជនីយដ្ឋាន​នោះ​នូវ​អ្វី​ដែល​គាត់​បាន​ឃើញនាថ្ងៃទី១១ ខែមីនា ឆ្នាំ២០១១កន្លងទៅ។​

          

នៅពេលរសៀល ពួកយើងបានទៅទស្សនា Oarai Aquarium Park ដែល​ជាកន្លែង​ចិញ្ចឹម និង​ដាក់​តាំង​បង្ហាញនូវ​សត្វសមុទ្រជាច្រើនប្រភេទសម្រាប់ទស្សនា។ លើសពីនេះទៅទៀត និយាយ​ចំពោះ​ទិដ្ឋភាពពេល​មានគ្រោះមហន្តរាយ សួនសត្វសមុទ្រនេះ​ជា​ទី​ខ្ពស់​សុវត្ថិភាពសម្រាប់​ប្រជាជន​មក​ភៀសខ្លួន ហើយ​ក្រោយ​ពី​គ្រោះមហន្តរាយ​នោះ​បានបញ្ចប់ សួនសត្វសមុទ្រនោះមាន​ការ​ខូត​ខាត​តិច​តូច​ប៉ុណ្ណោះ​ ដែល​វា​មាន​លក្ខណៈងាយ​ស្រួល​ក្នុង​ការ​ស្តារ​ឡើង​វិញ។

          សរុបមក ថ្ងៃនេះ​យើង​បាន​យល់ដឹងអំពីការ​ឆ្លើយតប និងវិធានការទប់ស្កាត់គ្រោះមហន្តរាយដ៏ល្អ និង​មាន​ប្រសិទ្ធភាពរបស់ឃុំOarai។ ម៉្យាង​ទៀត​យើង​ក៏​បាន​យល់ពីសារៈសំខាន់​នៃសួនសត្វសមុទ្រចំពោះ​ប្រជា​ជន​នា​ពេល​មាន​គ្រោះមហន្តរាយ ព្រម​បាន​ស្តាប់​ផ្ទាល់​នូវ​បទពិសោធន៍នៃការ​ឆ្លង​កាត់ និង​ការ​ស្តារឡើង​វិញពី​គ្រោះ​រលក​យក្សរបស់​អាជីវករម្នាក់ក្នុង​ឃុំនោះ​ផងដែរ។

ថ្ងៃទី១៤ ខែធ្នូ​ ឆ្នាំ២០១២(ថ្ងៃទី៥)

          នៅពេលព្រឹក ពួកយើងបានធ្វើដំណើរទៅស្រុក​Kasama ដើម្បីបំពេញទស្សនៈកិច្ចសិក្សានៅតំបន់​ដុត​ភាជន៍ដ៏ល្បី​មួយនេះ។ ពួកយើងបានចូលស្តាប់បទបង្ហាញមួយស្តីពីទំហំនៃការខូចខាត និង ការស្តារឡើងវិញរបស់ស្រុកKasama។

សកម្មភាពទស្សនកិច្ចឡដុតភាជន៏ក្នុងស្រុក Kasama

តាមរយៈបទបង្ហាញមួយនោះបានឲ្យដឹងថា ស្រុកKasama គឺជាស្រុកមួយដែលល្បីល្បាញខាងផលិតភាជន៍ និងសម្បូរទៅដោយឡល៍ដុតភាជន៍ ហើយវាស្ថិតនៅជិតទីក្រុងTokyo ជាងគេប្រើប្រៀបធៀបទៅនឹងតំបន់ដុតភាជន៍ផ្សេងៗក្នុង​ប្រទេស​ជប៉ុន។ កាលពីរញ្ជួយដីក្នុងថ្ងៃទី១១​ ខែមីនា ឆ្នាំ២០១១ នោះ បានធ្វើឲ្យមានការខូចខាតដូចជាផ្ទះជាច្រើនត្រូវបានរលំ ដោយឡែកស្រុកនេះពុំមានទទួលការខូចខាតដោយសាររលកយក្សស៊ូណាមីនោះទេ។ បន្ទាប់មក យើងក៏បន្តដំណើរទៅសារមន្ទីរសិល្បៈគ្រឿងភាជន៍ខេត្ត Ibaraki។ ពួកយើងបានឃើញពីគ្រឿងភាជន៍គ្រប់ប្រភេទទាំងប្រភេទបុរាណ និងសម័យបច្ចុប្បន្ន​ ដែល​សុទ្ធសឹងតែ​ជាស្នាដៃ​ប្រណិត​ៗបំផុត។

ពេលរសៀល ពួកយើងបានធ្វើដំណើរទៅកាន់មជ្ឈមណ្ឌលចាស់ជរាGreenHouse  ដែលស្ថិតក្នុងស្រុកKasamaនេះដែរ។ វាជាកន្លែងសម្រាប់ទទួលមនុស្សចាស់ដែលពុំមានកូនចៅថែទាំ ឬកូនចៅពុំមានពេលគ្រប់គ្រាន់។ យើងឃើញថាទីនោះមានឧបករណ៍ទំនើប និងអនាម័យខ្ពស់សម្រាប់ការរស់នៅរបស់មនុស្សចាស់ទាំងនោះ។​ ហើយនៅទីនោះក៏មាន   យុវជន​ យុវនារីស្ម័គ្រចិត្តដើម្បីចូលរួមបម្រើមនុស្សចាស់ជរាផងដែរ ជាក់ស្តែង​ពួក​យើង​បាន​នាំគ្នា​បង្កើត​កម្មវិធី​រាំលេង​កំសាន្ត​តាម​ចង្វាក់​ខ្មែរ ដែល​ធ្វើឲ្យ​បណ្តា​មនុស្ស​ចាស់​ជរា​នៅទីនោះ​មាន​ភាព​សប្បាយរីករាយជា​ខ្លាំង។

សរុបមក ថ្ងៃនេះយើង​បាន​ស្វែង​យល់​ពីផលប៉ះពាល់នៃរញ្ជួយដីទៅលើឧស្សាហកម្មផលិតភាជន៍ រួម​ជាមួយ​នឹង​វិធានការការពាររបស់​អ្នក​ស្រុក​Kasama។ យើងក៏បានដឹងពី​បញ្ហាសុខមាលភាពរបស់មនុស្សចាស់ និងសារៈសំខាន់នៃការងារស្ម័គ្រចិត្តផងដែរ។

ថ្ងៃទី១៥ ខែធ្នូ ឆ្នាំ២០១២(ថ្ងៃទី៦)

នៅពេលព្រឹក ពួកយើងបានធ្វើដំណើរទៅកាន់ស្ថានីយ៍សំចត(Road Station) មួយកន្លែងក្នុងស្រុកItako។

ម្ចាស់ស្ថានីយ៏បង្ហាញពីការខូតខាតក្នុងតំបន់របស់គាត់

នៅពេលរញ្ជួយដីនាឆ្នាំ២០១១ នៅតំបន់បានកើតមានបាតុភូតដីប្រែក្លាយជាជ្រាយ ដែល​​​ បណ្តាលឲ្យអគារស្រុតចុះទៅក្នុងដី ខូចខាតដំណាំកសិកម្ម។ លើសពីនេះទៅទៀត ការលេចឮពាក្យចចាអារាមដែលថាដំណាំនៅទីនេះរងការប៉ះពាល់ដោយជាតិវិទ្យុសកម្មដែលលេចធ្លាយពីរោងចក្រអគ្គិសនីនុយក្លេអ៊ែរនៅ Fukushima បានធ្វើឲ្យ​ការ​លក់​ផលិតផលកសិកម្មក្នុង​តំបន់នោះ​ត្រូវ​ធ្លាក់ចុះយ៉ាងធ្ងន់ធ្ងរ។ តែការពិត ដំណាំដែលដាំដុះនៅទីនេះមានគុណភាពល្អធម្មតាដោយពុំមានជាតិវិទ្យុសកម្មទេ ហើយគេក៏មានការត្រួតពិនិត្យយ៉ាងត្រឹមត្រូវពីអ្នកជំនាញផងដែរមុន​នឹង​ដាក់លក់។

នៅពេលរសៀល ពួកយើងទៅដល់សណ្ឋាគារItako ដើម្បីចូលរួមកម្មវិធីស្តីពីគ្រោះមហន្តរាយ និងការស្តារឡើងវិញនៃស្រុកItako។ ក្នុងនោះសំខាន់គឺនិយាយពីបាតុភូតដីប្រែក្លាយជាជ្រាយនៅពេលរញ្ជួយដី នេះដោយសារដីនៅតំបន់នោះជាអតីតបឹង ពុំមានភាពរឹងមាំ ដែលធ្វើអគារ សំណង់ផ្សេងៗទ្រេត និងស្រុតចុះក្នុងពេលជួបគ្រោះរញ្ជួយដីនោះ។ គេក៏បានលើកឡើងពីដំណោះស្រាយចំពោះបញ្ហាពីដោយប្រើបំពង់បង្ហូរទឹកចេញមកក្រៅ។

បន្ទាប់មកទៀត យើងបានផ្លាស់ប្តូរបទពិសោធន៍ជាមួយសិស្សវិទ្យាល័យ។ ដោយពួកយើងបានទទួលទានអាហារពេលល្ងាចជាមួយគ្នា និងមានការ​សំណះសំណាល់ជាមួយគ្នា។ សិស្សជនជាតិជប៉ុនបានសម្តែងសិល្បៈបុរាណរបស់ខ្លួនដោយគោះស្គរជប៉ុន ចំនែកនិស្សិតខ្មែរយើងក៏បានច្រៀង និងរាំរបាំប្រពៃណីជូនដល់ជនជាតិជប៉ុនវិញ។

សរុបមក ថ្ងៃនេះពួកយើង​បាន​យល់ដឹងច្បាស់អំពីការពិត​ ដែល​មានលក្ខណៈផ្ទុយពីពាក្យ​ចចាមអារាមមិន​ពិត ដែលបាន​ជះឥទ្ធិពលអាក្រក់​ដល់ផលិតផលកសិកម្មរបស់់ស្រុកItako។ បន្ថែមពីនេះទៀត​ យើង​ក៏បានយល់ពីមធ្យោបាយនៃការការពារដីជ្រាយ ហើយ​យើង​ក៏បាន​ធ្វើការផ្លាស់ប្តូរបទពិសោធន៍ និង​សិល្បៈជាមួយសិស្សវិទ្យាល័យជប៉ុនផងដែរ។

ថ្ងៃទី១៦ ខែ​ធ្នូ ឆ្នាំ២០១២(ថ្ងៃទី៧)

          កម្មវិធី​ពេល​ព្រឹក​ យើង​បាន​ធ្វើ​ដំណើរ​ទៅ​តំបន់Hinode ដែល​ជា​តំបន់រង​គ្រោះដោយ​សារ​គ្រោះរញ្ជួយ​ដី ដែល​បង្កឲ្យ​បាន​បាតុ​ភូត​ទឹក​ផុស​ធ្វើ​ឲ្យ​មាន​ការ​ខូច​ខាត​ផ្ទះ​សម្បែង

សកម្មភាពទស្សនកិច្ចនៅវត្តមួយនាតំបន់ Hinode

វត្តអារាម​ ផ្លូវ​ថ្នល់មួយ​ចំនួន​ធំ។​​ ទិដ្ឋភាព​បែប​នេះ​ពិត​ជា​បាន​ឆ្លុះ​បញ្ចាំង​ឲ្យ​ឃើញ​នូវ​ភាព​លំបាក​វេទនា​ និង​ការ​ខាត​បង់​ដ៏​ធ្ងន់ធ្ងរ​របស់​ប្រជា​ជន​ជប៉ុន។ បន្ទាប់​ពីបាន​ធ្វើទស្សនកិច្ចក្នុងវត្តមួយ​នៃតំបន់Hinode​នេះរួចមក យើង​ក៏បាន​ធ្វើ​ដំណើរត្រឡប់​មក​កាន់​សណ្ឋាគារ​វិញ​ដើម្បី​រៀបចំបទបង្ហាញ ក៏ដូច​ជា​ត្រៀម​ខ្លួន​ធ្វើ​បទ​​​បង្ហាញមួយ​នា​ពេល​រសៀល។ ​ក្រោយ​ពី​បាន​ស្រស់​ស្រូប​អាហារ​ពេល​រសៀល​រួច​មក យើង​ក៏​បាន​ចូល​រួម​ក្នុង​វគ្គ​បណ្តុះ​បណ្តាល​ខ្លីមួយ​អំពី​របៀប​ធ្វើ​ផ្កា​Ayame ដែល​ជា​ផ្កាដ៏​ល្បីក្នុង​ស្រុក​Itako។​​ យើង​បាន​ខិត​ខំ​ធ្វើ​ផ្កា​Ayameនោះ​យ៉ាង​យក​ចិត្ត​ទុក​ដាក់​បំផុត ព្រោះ​ថា​ផ្កា​ដែល​យើង​បាន​ធ្វើ​រួច​ យើង​នឹង​ធ្វើ​ជាវិភាគទាន​សម្រាប់​ឲ្យ​អ្នក​ស្រុក​នោះ​លក់​យក​ប្រាក់​ ដែល​ជា​ផ្នែក​មួយ​នៃការ​ចូល​រួម​ជួយ​ស្តារ​សេដ្ឋកិច្ច​របស់​ប្រជា​ជន​ទាំង​នោះ។ បន្ទាប់​ពី​កម្មវិធី​ដ៏​មាន​តម្លៃ​មួយ​នេះ គឺ​ដល់​ពេល​ដែ​ល​យើង​ត្រូវ​ធ្វើ​បទបង្ហាញ​ស្តី​ពី​ចំណាប់​អារម្មណ៍ និង​ផែនការ​សកម្មភាព​របស់​ពួក​យើង​ក្នុង​ការ​ជួយ​ស្តារ​​ឡើងវិញពីគ្រោះ​មហន្តរាយ ដែល​មាន​ការ​ចូល​រួម​ពីប្រជា​ជន​ក្នុង​ស្រុក​Itakoនោះ​ប្រមាណ​ជាង​២០នាក់។ 

ការធ្វើបទបង្ហាញរបស់ខ្ញុំស្តីពីបទពិសោធន៏ទទួលបានពីដំណើរ
ទស្សនកិច្ចមួយរយៈកន្លងមក

ក្រោយ​ពី​បាន​ធ្វើ​បទ​បង្ហាញ​ចប់​ប្រកប​ដោយ​ភាព​ជោគជ័យ​ យើង​បាន​អញ្ជើញភ្ញៀវកិត្តិយស​ទាឡើង​រាំ​លេង​កំសាន្ត​តាម​ចង្វាក់​ខ្មែរ​ចំនួន២បទ រួច​មាន​ការ​ថត​រូប​ទុក​ជា​អនុស្សាវរីយ៍ ហើយ​ក៏ធ្វើ​ការ​ប្រកាស​បិទ​កម្មវិធី។ បន្ទាប់​មកទៀតដល់​ពេល​យើង​ទទួល​ទាន​អាហារ​ពេល​ល្ងាច និង​ត្រឡប់​ទៅ​សំរាក​តាម​បន្ទប់រៀងៗខ្លួន។

សរុបមក ក្នុងថ្ងៃនេះយើង​បានទទួលនូវចំនេះ​ដឹង​ថ្មីៗ​ ជាពិសេស​របៀប​ធ្វើ​ផ្កា​Ayameដែល​មាន​ឈ្មោះ​ល្បី​ក្នុង​ស្រុកនោះ ហើយយើងបាន​ឃើញផ្ទាល់​នូវ​ទិដ្ឋភាពជាក់​ស្តែង​នៃ​ភាព​ខូច​ខាត​ដែល​បន្សល់​ដោយ​គ្រោះ​រញ្ជួយ​ដី​នៅ​ស្រុក​Itakoផងដែរ។

ថ្ងៃទី១៧ ខែ​ធ្នូ ឆ្នាំ២០១២(ថ្ងៃទី៨)

       

ការពន្យល់បង្ហាញរបស់បុគ្គលិកអគ្គិភ័យ

 ចាប់​ផ្តើម​ពី​ការ​ទស្សនកិច្ច​ស្ថានីយ៍អគ្គិភ័យនៅតំបន់Urayasu យើង​បាន​ទទួល​នូវ​ចំនេះ​​ដឹង​ជា​ច្រើន​ស្តី​ពី​កម្រិត​ និង​លក្ខណៈ​ខុសៗ​គ្នា​នៃ​ការ​រញ្ជួយ​ដី។​ យើង​​បាន​រៀន​ពី​របៀប​គេច​ខ្លួន​ពេល​មាន​អគ្គិភ័យ​កើតឡើង​ ហើយ​យើង​ក៏​មាន​ឱកាស​ចុះ​ទៅ​មើល​គ្រឹះ​នៃ​អគារ​មួយ​នោះ​ផង​ដែរ នោះជា​គ្រឹះ​នៃ​អគារ​ដែល​វិស្វករ​ជំនាញៗ​ធ្វើ​ឡើងដើម្បី​កាត់​បន្ថយ​កម្រិត​លំញ័រ​នៃ​រញ្ជួយ​។ វា​មាន​ប្រសិទ្ធភាព​ខ្ពស់​ប្រកប​ដោយ​     បច្ចេក​វិទ្យា​ និង​បច្ចេក​ទេស​ទំនើប​ ដែល​គេត្រូវ​ចំណាយ​ថវិកាយ៉ាង​ច្រើន​ដើម្បី​សាង​សង់។​

ចេញ​ពីស្ថានីយ៍អគ្គិភ័យនោះ យើង​បាន​សម្រាក​ទទួល​ទាន​អាហារ​ថ្ងៃត្រង់ រួច​បន្ត​ដំណើរ​  ទស្សនកិច្ចទៅ​វិទ្យា​ល័យ​ឯកទេស​ឧស្សាហកម្ម​ជាតិ​តូក្យូ(Tokyo National College of Technology)។

រូបថតជាមួយនាយកសាលា និងសិស្សានុសិស្ស

នៅទីនោះយើង​បាន​ទទួល​នូវ​ការ​ស្វាគមន៍យ៉ាង​កក់ក្តៅរាក់​ទាក់​បំផុតពី​សំណាក់​លោក​បណ្ឌិត​នាយកសាលា​ លោកគ្រូអ្នកគ្រូ​ និង​សិស្សានុសិស្ស​ក្នុង​វិទ្យាស័យនោះ។ បន្ទាប់​ពី​បាន​ទទួល​ស្តាប់​នូវ​បទបង្ហាញ​ដ៏មាន​តម្លៃរបស់​លោក​នាយកសាលា​ យើងក៏​បាន​ធ្វើ​ដំណើរ​ទស្សនកិច្ច​ក្នុង​បរិវេណ​វិទ្យា​ល័យ​នោះ​ រួម​មាន​អគារសិក្សាផ្នែក​មេកានិច ផ្នែកអេឡិចត្រូនិច និង​បណ្ណាល័យ​ដ៏ធំ​ផងដែរ។ បន្ទាប់​មក​ទៀត យើង​បាន​ចូល​រួម​ក្នុង​កម្ម-វិធី​សំណះ​សំណាល់​គ្នា​ជា​មួយ​សិស្ស​នៃ​វិទ្យា​ស័យ​នោះ ដែល​ឆ្លៀត​ក្នុង​ឧកាស​នេះពួក​យើង​ទាំង​អស់​គ្នា​បាន​ធ្វើការ​ដក​ស្រង់​បទ​ពិសោធន៍​ពីគ្នា​ទៅ​វិញ​ទៅ​មក​ប្រ​កប​ដោយ​ទឹក​ចិត្ត​ស្មោះ​ត្រង់​ និងសប្បាយ​រីករាយ​ជា​ទី​បំផុត។ កម្មវិធី​បន្ទាប់​ជា​ពេល​បរិភោគ​អាហារ​ពេល​ល្ងាច ហើយ​ដំណើរ​ទស្សនកិច្ច​ថ្ងៃ​ក៏​បាន​បញ្ចប់​ដោយ​ជោគជ័យ។

សរុបមក ក្នុងថ្ងៃនេះយើងបានទទួល​នូវ​ចំនេះ​ដឹង​ដ៏ល្អៗស្តីពី​របៀប​គេច​ខ្លួន​ពេល​មាន​អគ្គិភ័យ ដឹង​ពី​ទំហំ និងសភាពខុសៗគ្នា​នៃការ​រញ្ជួយ​ផែនដី ហើយយើងក៏បានទទួល​នូវបទ​ពិសោធន៍​អំពីការ​សិក្សា​នៅ​​វិទ្យា​ល័យ​ឯកទេស​ឧស្សាហកម្ម​ជាតិ​តូក្យូផងដែរ។

ថ្ងៃទី១៨ ខែ​ធ្នូ ឆ្នាំ២០១២(ថ្ងៃទី៩)

          នាពេលព្រឹកយើង​បាន​ទៅ​ធ្វើ​ទស្សនកិច្ច​សិក្សា​នៅ​សារៈមន្ទីរ​វិទ្យាសាស្រ្តមួយ​ក្នុង​ក្រុង​Tokyo។

លោកសាស្រ្តាចារ្យកំពុងបង្ហាញពីរបៀបកាត់បន្ថយរញ្ជួយ

សារៈមន្ទីរ​វិទ្យាសាស្រ្តនេះ​ជា​កន្លែង​ពោរពេញទៅ​ដោយ​ចំនេះដឹង​យ៉ាង​ទូលំទូលាយ ជា​ពិសេស​ក្នុង​ដំណើរ​ទស្សនកិច្ច​ទៅកាន់​សារៈមន្ទីរ​វិទ្យាសាស្រ្តមួយនេះ យើង​បាន​រៀន​ពី​វិធីការពារ​គ្រោះ​ធម្មជាតិមួយ​ចំនួន​ដូចជាការ​ការពារគ្រោះទឹកជំនន់ និងការ​កាត់បន្ថយ​កម្រិត​នៃ​​ការ​រញ្ជួយ​ផែនដី​របស់​អគារជាដើម។ តាមរយៈ​ការ​ធ្វើបទបង្ហាញភ្ជាប់​ជា​

មួយនឹង​​​ការធ្វើ​ពិសោធន៍​របស់លោក​សាស្រ្តចារ្យម្នាក់នៅទីនោះហើយ ​គាត់​ក៏បានអនុញ្ញាតិឲ្យពួកយើងបាន​អនុវត្ត​ពិសោធន៍​នោះ​ជាក់ស្តែងទៀតផងនោះ ដែលវាបាន​ធ្វើ​ឲ្យ​យើង​អាច​ចាប់យក  ​​ចំណេះ​ដឹងទាំងអស់​នោះ​បាន​ប្រកប​ដោយ​ភាព​ងាយ​ស្រួល​។ នា​ពេលរសៀល​ជា​ពេល​ដែល​យើង​ត្រូវ​ធ្វើ​បទ​បង្ហាញ​របាយការណ៍ស្តី​ពីចំណាប់​អារម្មណ៍ និង​អ្វី​ដែល​យើង​បាន​រៀន​នា​ពេល​កន្លង​មក​ទៅ​អោយ​បណ្តា​អ្នក​ស្តាប់ជាច្រើន ដែល​ក្នុង​នោះ​រួម​មាន​លោក​តំណាង​ស្ថាន​ទូត​ខ្មែរនៅប្រទេសជប៉ុន លោក​តំណាង​ក្រសួង​ការបរទេសជប៉ុន និង បុគ្គលិក​ជាន់​ខ្ពស់​នៃ​អង្គការ​JICEផងដែរ។ លទ្ធផលនៃ​ការ​ធ្វើ​បទបង្ហាញនោះគឺសម្រេច​បានល្អ និងជោគជ័យដែល​ជា​បទ​ពិសោធន៍​ដ៏​ល្អ​សម្រាប់​យើង​ទាំង​អស់គ្នា។

សរុបមក ក្នុងថ្ងៃនេះយើងបានរៀន និងដឹងពីវិធីបង្ការ​គ្រោះទឹកជំនន់ ការ​កាត់បន្ថយ​កម្រិត​នៃ​​ការ​រញ្ជួយ​ផែនដីចំពោះ​អគារ ព្រមទាំងបានទទួល​​បទពិសោធន៍ថ្មី​អំពីរបៀប​ធ្វើ​បទ​បង្ហាញ និង​ទទួល​បាន​នូវ​អនុសាសន៍ដ៏ល្អៗពី​សំណាក់​អ្នក​ចួល​រួម​ស្តាប់ទៀតផង។

ថ្ងៃទី១៩ ខែ​ធ្នូ ឆ្នាំ២០១២(ថ្ងៃទី១០)

ថ្ងៃនេះជាថ្ងៃចុងក្រោយនៃដំណើរទស្សនកិច្ចរបស់ពួកយើង ជាពេល​ដែលយើង​ត្រូវត្រលប់មក​មាតុប្រទេសវិញ។ ពួក​យើង​មិន​ចង់ចាក​ចេញពី​ប្រទេស​ជប៉ុន​ទេ ប៉ុន្តែ​យើង​ក៏​មិន​អាច​បោះ​បង់​ការ​សិក្សា​របស់​យើង​បាន​ដែរ។ ជាទី​បញ្ចប់​នៃ​ដំណើរ​ទស្សនកិច្ច​ដ៏​វិសេស​នេះ​គឺ​ពួក​យើង​ទាំង​អស់​គ្នា​បាន​មក​ដល់​ប្រទេស​កម្ពុជា​ដោយ​សុវត្ថិភាព​ក្នុង​ថ្ងៃដដែល​នា​វេលា​ម៉ោង​ប្រមាណ១៩.០០ ម៉ោងនៅកម្ពុជា។

សន្និដ្ឋាន

          ឆ្លងកាត់​តាម​ដំណើរ​ទស្សនកិច្ច​សិក្សា​រយៈពេល​១០ថ្ងៃក្នុង​ប្រទេស​ជប៉ុន​រួច​មក ពួក​យើង​បាន​ទទួល​នូវ​ចំណេះដឹង​ និង​បទពិសោធន៍ជាច្រើន​ដែល​សុទ្ធសឹង​តែ​មាន​ប្រយោជន៍​សម្រាប់​ខ្លួន​យើង​ និង​សង្គម​ជាតិ​ទាំង​មូល​ផង​ដែរ​។ យើង​នឹង​យក​បទពិសោធន៍​ និង​ចំណេះ​ដឹង​ទាំង​នោះ​មក​អនុវត្ត​ក្នុង​ជីវភាព​រស់​នៅ​របស់​យើង​ប្រចាំ​ដើម្បី​ជា​ស្ពាន​សម្រាប់​ធ្វើ​ការ​អភិវឌ្ឈខ្លួន​ និង​សង្គម​ជាតិ​ឲ្យ​មាន​ការ​រីក​ចម្រើន​ និង​ជឿនលឿនដូច​ប្រទេស​ជប៉ុន​ដែរ។ ជាទី​បញ្ចប់​យើង​ខ្ញុំ​សូម​សម្តែង​ការ​ថ្លែង​អំណរគុណ​ដល់​បណ្តា​អង្គភាពទាំង​អស់​ដែល​បានជួយសម្រួល​គ្រប់​បែប​យ៉ាង​ក្នុង​ដំណើរ​ទស្សនកិច្ច​មួយ​នេះ ជា​ពិសេសយើង​ខ្ញុំសូម​អរគុណ​ដល់​វិទ្យា​ស្ថាន​បច្ចេកវិទ្យា​កម្ពុជា​ដែល​បាន​ផ្តល់​ឱកាស​ឲ្យ​​​យើង​ខ្ញុំ​បាន​ចូល​រួម​ក្នុង​កម្មវិធី​ទស្សនកិច្ច​ដ៏វិសេសវិសាល​មួយ​នេះ។

​​​​​​​​​​​​​​​​​​​​​​​​​​​​​​​​​​​​​                                                                             ​​​​​​​​